- Errepidetik zelan ibili. Errepidean bazterbidetik joango gara egokia bada, bestela galtzadatik joango gara eta erreiaren heren bat okupatuko dugu, eskumaldean (herenbidetik). Taldeka joanez gero, binaka jarriko gara eta noski, errei osoa edo ia osoa okupatuko dugu. Auto-ilararik sortzen badugu, ilaran jarriko gara errazago aurrera gaitzaten.
- Kaleetan zelan ibili. Baina kaleetan, hau da, herriguneetan, kale estuetan edo ibilgailuek gu aurreratzeko leku gutxi dutenetan, erreiaren erditik joatea gomendatzen da (erdibidetik), ahal dela, gainerako ibilgailuen antzeko abiaduran. Gainerako trafikoa baino askoz motelago bagoaz uneren batean bazterrean gelditu gaitezke aurrera gaitzaten baina berriro ere erdigunetik joatea hobe, segurtasun handiagoa dugulako.
- Taldearen iritzia. Parte-hartzaileei azalpen hau eman ondoren, gauden kalean zein jarreran joan behar dugun galdetuko diegu taldeko kideei eta haiek arrazoitu behar digute.
- Behaketa. Kaleetatik gabiltzanean gauza guztiei adi egon behar garela gogoraraziko diegu. Une batean begiraleok errepidera sartuko gara eta atzera, albora eta aurrera begiratuko dugu, bi aldiz, ondoren ikasleengana itzulita. Ondoren taldeko kideei kontatuko diegu atzean zein koloretako ibilgailua eduki dugun, aurrean zer motatako ibilgailua, etab., ikasleek konturatzeko hiru begiratu horiekin gauza gehiagoz ohartu gaitezkeela.