- Eskubide berdinak. Bizikletek eta patinetek, autopistetan eta kasu batzuetan autobideetan izan ezik, edozein gainerako ibilgailu bezala ibiltzeko eskubidea dute, eta, beraz, ez dira oztopo baten moduan ikusi behar, beste ibilgailu baten gisan baizik, bere eskubide eta betebehar guztiekin.
- Istripu gehiegi. Mapfrek egindako azterketa baten arabera, txirrindulariek izandako istripu larrien % 90 autoen kontra edo haiek harrapatuta izaten dira. Gainera, istripu gehienak ondo ikusten den errepide zabaletan izaten dira. Bestetik, Eusko Jaurlaritzaren azterketa baten arabera, txirrindularien erdiaren aburuz, gidariek haiekiko begirune gutxi dute.
- Tropelean. Horrela joaten direnean txirrindulariak 2ko ilaretan jarri behar dira. Elkar aurerratzean ere biko ilarak errespetatu behar dituzte derrigorrez. Beraz, ez diegu klaxona jo behar edo errieta egin, besteak beste, legez horrela joan daitezkeelako.
- Salbuespenak. Ikuspen gutxiko eremuetan edo trafiko pilaketak sortzen direnean ezin dira tropelean joan baina gainerakoetan bai. Salbuespen horietan, ilaran jartzea eskatu ahal diegu, aurreratzen uzteko, keinukariak erabiliz.
- Araua. Taldekatuta joateko modu horri agirika egiten diotenek legedia eta eskubideak ez dituztela ezagutzen erakusten dute. Klaxona nabarmenki jotzea edo agirika egitea guztiz gaitzesgarriak dira. Izan ere, komeni da nabarmentzea txirrindulariak tartean dauden ezbehar gehienetan bakarrik edo ilaran zihoazela, talderik osatu gabe, beraz, bistan dago taldekatuta ibiltzean babestuago egoten direla.
- Jarrera desegokiei ez erantzun modu berean. Batzutan txirrindulariek trafiko-arauak bete ez dituztenean jokabide desegokia eduki ahal dute baina horrek ez luke gure aldetik orroka hastea edo haiek beldurtzeko haien ondotik pasatzea ekarri beharko. Beti gizalegez jokatu behar dugu, segurtasunerako ere egokiagoa delako.
- Presarik ez. Batzuetan segundo batzuk irabaztearren, ez dugu segurtasunez gidatzen eta holakoetan txirrindulariak arriskuan jartzeko aukera gehiago egon daiteke, ez itxaroteagatik. Bizitza batek milioika segundo baino gehiago balio duela gogoan izan. Azterketa baten arabera, gidariok abiadura % 5 jaitsiko bagenu, txirrindularien istripu larriak %25 gutxiago izango lirateke.